/p. 454/ humidoque spiritu circa cadavera oberrant, tanquam
circa cognatum aliquod eas alliciens.
Quare Philosophi agnoscentes ex defuncti moribus
illius animae affectus et proprietates, per
consimiles vapores, liquores nidoresque facile
ad vitam evocare poterunt. Hinc apud Homerum
Circe docet Ulixem, ovis, lacte, melle,
oleo, vino, aqua, farina, etc. animas ad corpora
invitari. I. C. – Haec si vera essent, perditissimam
nequissimi nebulonis Henrici Silvij animam
ad subtriste cadaver blanditijs eius impudicus amasius
attraxisset, dum illotis a ventris exoneratione
manibus illius membra pertractabat. Cur
Germanorum animas iterum corpori non restituit
gratissimus illis vini odor, quo tota funebris
domus imo et ipse loculus ubertim affusus
est? Alex. – Tuus Pomponatius quid censuit?
I. C. – Non esse a veritate alienum ut novus legifer
mortuos vivificet; haec enim illi a sideribus
facultas concedi potest. Alex. – Tyaneus
mortuos resurrexit; sideribus tamen invisus erat,
quod ex eo abunde colligere licet, nam illius
lex, vix exorta, interijt. I. C. – Respondent Athei
illud accidisse propterea quod paupertatem,
quam ipse mirum in modum excoluit: sane
ingentem auri copiam in mari proiecisse fertur,
inquiens «pessundo divitias, ne pessundar ab illis» discipulis
commendavit. «At ubi paupertas – inquit Cardanus[1] –
et contemptus, nullus ordo perpetuus, sed omnes eo
diuturniores quo potentiores». Alex. – Haec in Amphitheatro
scitissime confutasti. Sed quid Arabes Philosophi
de mortuorum resurrectione senserunt?